Tegelen – De Pannekletser, de hoeëgste óngersjei-ing van vastelaovesgezelsjap De Beerpiëp oet Tegele, is dit jaor toegekind aan Piet Hoeben. De oétreiking zal op zaoterdig 1 fibberwarie plaatsvinge in kultureel centrum De Haandert in Tegele.
Piet Hoeben is al jaorelangk de sjpin in ‘t web binne ‘t vreejwilligerswerk in de Tegelse wiék Oppe Hei, woë-in hae allewiels al mier den dreej decennia aktief is. Hae lag in 2010 ‘t fundament vur óntmoetingscentrum De Glazenap en bouwde dit oet toet ein trefpunt det in de aafgeloupe vieftién jaor ‘nne sjtevige impuls haet gegaeve aan de sosjale cohesie in de wiék en de saamhuërigheid tösse de buurtbewoëners.
Daonaeve is deze 74-jäörige Tegelenaer oprichter van de Tegelse Sjaakvereiniging. Ouch heej haet hae pionierswerk verrich met ‘t opzette van ‘n jeugopleiding die toet de beste van Nederland behuërt. Piet Hoeben waas viertig jaor veurzitter en jeugtrainer beej dees klub.